جاپانی ٹرین کا تیز رفتاری کا نیا عالمی ریکارڈ

جاپان میں ایک جدید ’میگلیو‘ ٹرین نے اپنے آزمائشی سفر کے دوران 600 کلومیٹر فی گھنٹہ کی رفتار سے سفر کرکے نیا عالمی ریکارڈ بنا لیا ہے۔

سات بوگیوں کی اس ٹرین نے اس آزمائشی سفر کے دوران ایک موقع پر 603 کلومیٹر فی گھنٹہ کی رفتار سے بھی سفر کیا اور مسلسل 11 سیکنڈ 600 کلومیٹر فی گھنٹہ کی رفتار سے زائد سے سفر کیا۔

گزشتہ ہفتے اسی کمپنی کی ٹرین سے اپنے 2003 کے سابقہ ریکارڈ کو توڑتے ہوئے 590 کلومیٹر فی گھنٹہ کی رفتار سے سفر کرکے ریکارڈ قائم کیا تھا۔

'میگلیو' ٹرین اپنے ٹریک سے تقریباً چار انچ اوپر ہوا میں معلق ہوتی ہے اور اسے برقی مقناطیسیت کے اصول کے تحت چلتی ہے۔

جاپانی کے ریلوے حکام اس ٹرین کو 2027 تک عام استعمال کے لیے پیش کرنا چاہتے ہیں اور پہلی ٹرین جاپان کے دارالحکومت ٹوکیو اور ناگویا کے درمیان چلائی جائے گی۔

اس ٹرین کی زیادہ سے زیادہ رفتار 500 کلومیٹر رکھی جائے گی اور یہ ٹوکیو اور ناگویا کے درمیان 286 کلومیٹر کا فاصلہ 40 منٹ میں طے کرے گی۔