فیس بک خودپسندی کے لیے بہترین ویب سائٹ؟

خود پسند یا اپنے آپ کی حد سے زیادہ ستائش ایسی چیز ہے جو متعدد افراد کی شخصیت کا حصہ بن جاتی ہے اور ایسے لوگ سماجی رابطے کی ویب سائٹ فیس بک پر سب سے زیادہ سرگرم ہوتے ہیں۔

یہ بات امریکا میں ہونے والی ایک نئی دلچسپ تحقیق میں سامنے آئی ہے۔

الاباما یونیورسٹی کی تحقیق کے مطابق سماجی رابطوں کی ویب سائٹس خاص طور پر فیس بک خود پسند افراد کے لیے جنت سے کم نہیں اور لوگ اسے اپنے لیے مثالی پلیٹ فارم تسلیم کرتے ہیں کیونکہ وہاں وہ لوگوں کو اپنی ذات کے بارے میں بات کرنے کے لیے مدعو کرسکتے ہیں۔

دلچسپ امر یہ ہے کہ ان کی روزمرہ کی زندگی کی چاہے جتنی بھی معمولی بات ہو وہ اس کو سامنے لاکر لوگوں سے لائکس اور تعریفی کمنٹس کے ذریعے اپنی انا کو مزید توانا کرسکتے ہیں۔

تحقیق میں بتایا گیا ہے کہ جو لوگ خودپسندی کے عادی نہیں ہوتے وہ فیس بک پر اتنے سرگرم بھی نہیں ہوتے جبکہ اپنے آپ کو پسند کرنے والے افراد اپنی تشہیر میں زیادہ مگن رہتے ہیں اور اس ویب سائٹ کو خود کو منظرعام پر لانے اور لوگوں کی ستائش حاصل کرنے کے لیے استعمال کرتے ہیں۔

تحقیق کے دوران محققین نے فیس بک صارفین میں خودپسندی کی سطح کا جائزہ لے کر ان کی پروفائلز تک رسائی حاصل کی اور ان کے سوشل نیٹ ورکس پر لوگوں کے آنے والے ردعمل یعنی لائکس اور کمنٹس کی تعداد کا جائزہ لیا۔

اس کے بعد سامنے آنے والے نتائج حیران کن تھے جن کے مطابق فیس بک پر پوسٹ کرنے والا جتنا زیادہ اپنی تشہیر کرنے لگتا ہے اسے سائٹ پر لوگوں کی توجہ اتنی ہی کم ملنا شروع ہوجاتی ہے۔

دوسروں سے فائدہ اٹھانے والے اور ہر چیز پر اپنا استحقاق سمجھے والے افراد کو خودپسندی کے بدترین اثرات کا سامنا ہوتا ہے کیونکہ فیس بک صارفین ایسے لوگوں کی شناخت کرکے انہیں نظرانداز کرنا شروع کردیتے ہیں۔