اپنی فیس بک پروفائل کو پیج میں بدلیں

فیس بک پر دوستوں کی بڑھتی تعداد یہ سوچنے پر مجبور کرتی ہے کہ کاش ہم پروفائل کی بجائے اپنا پیج بنا لیتے تو سب لوگ باآسانی اسے لائیک کر کے اپ ڈیٹ رہتے۔ اکثر لوگوں نے فیس بک کے ابتدائی دنوں ایسی پروفائلز بنائیں جو کہ پیج ہونے چاہیے تھے اور ایسی پروفائلز ابھی بھی موجود ہیں۔ اگرچہ ایک نیا پیج بنا لینا کوئی مشکل نہیں لیکن اس طرح جو پہلے سے دوست یا فالوورز ہوں گے انھیں پیج دوبارہ لائیک کرنا ہو گا۔ مزیدار بات یہ ہے کہ فیس بک پر پروفائل سے پیج پر منتقل ہونے کا ٹول دستیاب ہے۔ جو کہ دوستوں اور فالوورز کو ضائع کیے بنا پروفائل کو پیج بنا دیتا ہے۔ پروفائل کے مقابلے میں پیج کے کئی فوائد ہیں۔ ایک تو یہ کہ جو چاہے وہ آپ کا پیج لائیک کر کے اپ ڈیٹس حاصل کر سکتا ہے۔ اس کے علاوہ آپ دوسرے دوستوں کو پیج ایڈمن بنا کر پیج کو اپ ڈیٹ رکھ سکتے ہیں۔ یعنی آپ کو اپنی پرفائل کا لاگ ان پاس ورڈ کسی کو دینے کی ضرورت نہیں رہتی۔ آئیے آپ کو مرحلہ وار بتاتے ہیں کہ کیسے کسی پروفائل کو پیج پر منتقل کیا جا سکتا ہے۔ یہ طریقہ کار انتہائی آسان ہے اور صرف چند منٹس میں آپ کی پروفائل کا سارا ڈیٹا پیج میں منتقل کر دیتا ہے۔

1۔ اپنا فیس بک اکاؤنٹ لاگ اِن کر لیں جسے آپ پیج بنانا چاہتے ہوں۔

2۔ سب سے پہلے تو اکاؤنٹ سیٹنگز میں جا کر اپنا تمام ڈیٹا بیک اپ کر کے ڈاؤن لوڈ کر لیں۔ یہ اس لیے ہے کہ اگر اس منتقلی کے دوران آپ کا کچھ ڈیٹا ضائع ہو جائے تو اسے آپ ری اسٹور کر سکیں۔

3۔ اب وقت ہے پروفائل کو پیج میں منتقل کرنے کا۔ ایک دفعہ پھر یقین دہانی کر لیں کہ آپ اسی پروفائل پر ہیں جسے پیج بنانا مقصود ہے۔ اس کے بعد فیس بک کا مائیگریشن لنک کھو ل لیں: مائیگریشن لنک  

4۔ اس مرحلے پر فیس بک کی ہدایات پر عمل کرتے جائیں، آپ کی پروفائل کو پیج پر منتقل کر دیا جائے گا۔ یہ عمل مکمل ہونے کے بعد آپ کی پروفائل کی جگہ پیج موجود ہو گا اور آپ ایک فیس بک پیج کے تمام فیچرز استعمال کر پائیں گے۔

چند چھوٹے لیکن اہم ٹولز

بعض اوقات ہمیں ایسے چھوٹے ٹولز کی ضرورت پڑتی ہے جن کو چلاتے ہی کوئی مسئلہ ٹھیک ہو جائے جیسے کہ ٹمپریری فائلز ڈیلیٹ کرنا یا پرنٹر کے کام نہ کرنے کی صورت میں اس کی سروس کو دوبارہ سے چلانا وغیرہ۔
اس لیے Some small tools کے نام سے ایک چھوٹا سا بنڈل موجود ہے جس میں انتہائی کارآمد چھوٹے چھوٹے آٹھ ٹولز کو جمع کیا گیا ہے۔

1: TempCleaner

یہ ایک چھوٹا سا پورٹ ایبل ٹول ہے جو سسٹم سے عارضی فائلوں کو ڈیلیٹ کرتا ہے۔ مختلف پروگرامز کام کے دوران سسٹم پر عارضی فائلز بناتے رہتے ہیں۔ ہر کچھ عرصے بعد ان فائلوں کو صاف کر دینا چاہیے۔ اس کام کے لیے آپ ٹیمپ کلینر استعمال کرسکتے ہیں۔ اس کے چلاتے ہی یہ سسٹم سے صرف ٹمپریری فائلز کو ڈیلیٹ کر دیتا ہے۔

2: ری ایکسپلورر

کئی صورتوں میں سسٹم کو ری اسٹارٹ کرنے کی ضرورت پڑتی ہے۔ مثلاً ونڈوز اپ ڈیٹس انسٹال کریں یا کوئی سافٹ ویئر، انھیں کارآمد بنانے کے لیے ضروری ہوتا ہے کہ سسٹم ری اسٹارٹ کیا جائے۔ ان صورتوں میں سسٹم ری اسٹارٹ کرنے کی زحمت اُٹھائی جا سکتی ہے لیکن چھوٹی موٹی فائلیں جب ڈیلیٹ ہونے سے انکاری ہوں تو سسٹم کو ری اسٹارٹ کرنا کافی جھنجٹ کا باعث بنتا ہے۔ اس صورت حال میں ونڈوز ایکسپلورر کی سروس کو ری اسٹارٹ کر لینا ہی کافی رہتا ہے۔ اس کام کے لیے ری ایکسپلورر ٹول کو استعمال کیا جا سکتا ہے۔ یہ چھوٹا سا پورٹ ایبل ٹول چلتے ہی ونڈوز ایکسپلورر کو ری اسٹارٹ کر دیتا ہے۔ خاص بات یہ ہے کہ یہ کھلے ہوئے فولڈرز کو نوٹ کر لیتا ہے اور ونڈوز ایکسپلورر کے دوبارہ چلتے ہی وہ تمام فولڈرز کھول کر آپ کو زحمت سے محفوظ رکھتا ہے۔

:3 فکس پرنٹس

پرنٹر کو پرنٹس بھیجتے ہوئے پرنٹس کا سلسلہ رُک جانا ایک عام سی بات ہے۔ پرنٹرسپولر میں جا کر ان رُکے پرنٹس کو ڈیلیٹ کرنے کی کوشش کریں تو یہ معاملہ اور زیادہ اُلجھ جاتا ہے۔ اس مسئلے کو خوش اسلوبی سے نمٹانے کے لیے ’’فکس پرنٹس‘‘ کو چلائیں۔ یہ ٹول تمام رُکے ہوئے پرنٹس کو صاف کر کے سپولر کی سروس کو دوبارہ چلا کر پرنٹر کو استعمال کے قابل بنا دیتا ہے۔

:4 ری بلڈ آئی کن کیشے

بعض اوقات ونڈوز ایکسپلورر پروگرامز کے آئی کن غلط دکھانا شروع کر دیتا ہے۔ اس مسئلے کو درست کرنے کے لیے ReIconCache.exe کو چلائیں۔

:5 کاپی آئی پی

اگر سسٹم کی آئی پی جاننا مقصو ہو تو اس کے لیے اس بنڈل میں ’’کاپی آئی پی‘‘ موجود ہے۔ اسے چلاتے ہی آئی پی ایڈریس کلپ بورڈ میں کاپی ہو جاتا ہے۔

:6 اپ ڈیٹ ٹائم

کئی سافٹ ویئر کے انسٹال یا درست کام کرنے کے لیے سسٹم کا ٹائم اور تاریخ ٹھیک ہونا بہت ضروری ہوتا ہے۔ اس کے لیے UpdateTime.exe کو چلائیں یہ دونوں چیزیں فوراً درست ہو جائیں گی۔

:7 شٹ ڈاؤن

اگر کبھی آپ کے سامنے ونڈوز ایٹ آجائے اور آپ کو اسے شٹ ڈاؤن کرنا ہو گا تو آپ شٹ ڈاؤن کا بٹن تلاش ہی کرتے رہیں گے جو کہ ملنا مشکل ہے۔ ایسی صورت میں اس بنڈل میں موجود shutdown.exe چلائیں، فوراً ہی شٹ ڈاؤن کا مینو آپ کے سامنے موجود ہو گا۔

:8 ریڈیوس میموری

پراسیسر کو تیزی سے ڈیٹا فراہم کرنے کے لیے ریم عارضی طور پر ہارڈ ڈسک سے ڈیٹا اسٹور کرلیتی ہے تاکہ پروگرامز اور پراسیس تیزی سے چل سکیں۔ لیکن حد سے زیادہ ریم کا استعمال سسٹم کو ہینگ کر دیتا ہے۔ ریم کا استعمال کم کرنے کے لیے اس بنڈل میں Reducememory.exe ٹول موجود ہے۔

مکمل بنڈل کا سائز: 2.3MB
ڈاؤن لوڈ کریں

جانیے کب آپ کی ای میل پہنچی اور پڑھی گئی- کروم

آؤٹ لُک استعمال کرنے والے ای میل بھیجتے ہوئے درخواست کر سکتے ہیں کہ اسے پڑھنے پر آگاہ کیا جائے۔ لیکن اگر ای میل موصول کرنے والا اسے نظرانداز کر دے تو پتا نہیں چلتا کہ ای میل دیکھی جا چکی ہے یا نہیں۔ اگر آپ کسی کو ای میل بھیجنے کے بعد جواب کے منتظر رہتے ہیں اور آگے سے یہ جواب ملے کہ آپ کی ای میل موصول ہی نہیں ہوئی تو اس کا حل ’’میل ٹریک‘‘ کی صورت میں موجود ہے۔
میل ٹریک آپ جی میل کے ساتھ استعمال کر سکتے ہیں۔ اس کے کام کرنے کا طریقہ وٹس ایپ ایپلی کیشن کے میسجنگ سسٹم جیسا ہے۔ یعنی ای میل بھیجنے پر ای میل پر ایک چیک یا ٹِک (Tick)لگ جاتا ہے اور ای میل کھولنے پر ڈبل چیک۔ جس سے آپ فوراً جان سکتے ہیں ای میل نہ صرف پہنچ چکی ہے بلکہ دیکھی بھی جا چکی ہے۔
یہ پلگ اِن گوگل کروم براؤزر کے لیے بالکل مفت دستیاب ہے۔ اس کے علاوہ چونکہ آپ کا ای میل اکاؤنٹ بہت قیمتی اثاثہ ہے اس لیے پلگ اِن کی جانب سے مکمل رازداری اور حفاظت کی ضمانت ہے۔
دراصل یہ پلگ اِن ای میل کے ساتھ ایک ابتہائی چھوٹی سی تصویر بھی بھیجتا ہے، جو کہ دیکھے جانے پر میل ٹریک کو رپورٹ کرتی ہے اور ای میل پر ڈبل ٹِک لگ جاتا ہے۔ اس کے علاوہ ہر ای میل کے ساتھ “sent with MailTrack” کا سگنیچر بھی برداشت کرنا پڑتا ہے۔

میل ٹریک پرائیویسی اور حفاظت کے وعدے کے ساتھ سو فیصد مفت دستیاب ہے۔

http://mailtrack.io

فولڈر پر بنا کسی سافٹ ویئر کے پاس ورڈ لگائیں

فولڈر پر پاس ورڈ لگانے کے کئی طریقے موجود ہیں۔ ان میں سے زیادہ تر طریقوں میں سافٹ ویئر استعمال ہوتے ہیں۔ اس ٹپ کی بدولت آپ باآسانی ایک پاس ورڈ سے محفوظ فولڈر بنا سکتے ہیں۔ لیکن اسے پہلے ایک نیا فولڈر بنا کراور اس میں چند عام فائلیں کاپی کر کے آزمائیں، جب اچھی طرح سمجھ آجائے تب اپنا اہم ڈیٹا اس فولڈر میں رکھیں، تاکہ کسی قسم کا نقصان نہ ہو۔

اس کام کے لیے کہیں بھی ایک نیا فولڈر بنا لیں۔ فولڈر کے اندر رائٹ کلک کر کے New کے مینو سے Text document منتخب کر لیں۔
اب اس بنائی گئی ٹیکسٹ فائل میں آپ کو کوڈ پیسٹ کرنا ہے۔ یہ کوڈ چونکہ کچھ طویل ہے اور اسے ٹائپ کرنا مشکل ہے اس لیے ہم نے ایک ورڈ فائل بنا کر آپ کے لیے درج ذیل ربط پر رکھی ہے، اسے کھول کر یہاں سے ٹیکسٹ کاپی کر لیں اور نوٹ پیڈ فائل میں پیسٹ کریں:
http://bit.ly/folder-locker

اس کوڈ میں جہاں computing2014 لکھا ہے یہاں آپ کو اپنا پاس ورڈ لکھنا ہے۔ اگر آپ یہ ایڈٹ نہ کریں تو یہی اس فولڈر کا پاس ورڈ ہو گا۔ اب اس ٹیکسٹ فائل کوئی بھی نام دے کر آخر میں.bat ایکسٹینشن دیں اور نیچے موجود Save as type میں All files کرتے ہوئے save کر دیں۔

فرض کریں آپ نے فولڈر کے اندر locker.bat کے نام سے فائل بنا لی ہے۔اب آپ اسے ڈبل کلک کر کے چلائیں تو یہ اسی فولڈر کے اندر ایک نیا فولڈر بنا دے گی۔ یہی آپ کا خفیہ فولڈر ہو گا۔

locker.bat فائل پر دوبارہ ڈبل کلک کریں تو کمانڈ پرامپٹ کی ایک ونڈو کھل جائے گی اور پوچھا جائے گا کہ کیا آپ اس فولڈر کو لاک کرنا چاہتے ہیں۔Y لکھ کر انٹر پریس کر دیں۔ فولڈر فوراً ہی غائب ہو جائے گا۔

اسی لاکر فائل پر دوبارہ ڈبل کلک کریں تو کمانڈ پرامپٹ ونڈو دوبارہ کھل جائے گی جس میں پاس ورڈ طلب کیا جائے گا۔

درست پاس ورڈ ٹائپ کر کے انٹر پریس کرتے ہی فولڈر واپس آجائے گا۔ جبکہ غلط پاس ورڈ کی صورت میں فولڈر نظر نہیں آئے گا۔

یقیناً یہ کوئی زیادہ محفوظ طریقہ نہیں ہے کیونکہ پاس ورڈ locker.bat فائل کے اندر لکھا ہے جسے جب چاہیں رائٹ کلک کر کے ایڈٹ پر کلک کرنے سے نوٹ پیڈ میں کھول کر دیکھا اور پاس ورڈ بدلا جا سکتا ہے۔ پاس ورڈ بھول جانے کی صورت میں بھی اسی فائل کو ایڈٹ کر کے دیکھیں۔

لیکن یہ ایک دلچسپ تجربہ ضرور ہے۔ اگر آپ اس لاکر فائل کا نام ایسا رکھیں کہ کوئی اسے نہ کھولے یا اسے hide کر دیں تو اس طریقے سے بھی اپنا ذاتی ڈیٹا دوسروں سے محفوظ رکھا جا سکتا ہے۔

یاد رہے کہ اس ٹپ کی بدولت آپ جس ڈائریکٹری میں چاہیں پاس ورڈ سے محفوظ ایک فولڈر ضرور تیار کر سکتے ہیں لیکن پہلے سے موجود کسی فولڈر پر پاس ورڈ نہیں لگا سکتے۔ اس کے علاوہ لاکر فائل کے ڈیلیٹ ہونے سے آپ کا ڈیٹا بھی ضائع ہو سکتا ہے۔