پاکستانی ٹیم سے خطرہ نہیں، اظہرالدین

نئی دہلی: ہندوستان کے سابق کپتان محمد اظہرالدین نے کہا کہ عالمی کپ میں پاکستان انڈین ٹیم کے لیے خطرہ نہیں۔

اظہرالدین جن کی قیادت میں ہندوستانی ٹیم نے تین عالمی کپ مقابلوں میں پاکستان کو شکست دی، نے کہا کہ انڈیا کا پاکستان کے خلاف بہترین ریکارڈ مصباح الحق الیون کے ذہنوں میں ہوگا۔

مزید پڑھیں: 'اجمل کو ورلڈ کپ کیلئے کلیئر کیا جاسکتا ہے'

پی ٹی آئی کو انٹرویو میں ان کا کہنا تھا کہ ہندوستان اور پاکستان کے درمیان میچ ہمیشہ اہم ہوتا ہے، ہم پاکستان سے ورلڈ کپ میں کبھی نہیں ہارے اور یہ سب کے ذہنوں میں ہوگا۔

انہوں نے کہا کہ انڈیا کی ٹیم اچھی ہے اور اگر انہوں نے بہتر کھیل پیش کیا تو پاکستانی ٹیم انڈیا کے لیے خطرہ نہیں بنے گی۔

تاہم 51 سالہ سابق کرکٹر کا یہ بھی کہنا تھا کہ انڈیا کو جنوبی افریقہ جیسی ٹیموں کے خلاف اپنے کھیل کو مزید بہتر بنانا ہوگا۔

ان کا مزید کہنا تھا کہ انڈین ٹیم میں ٹیلنٹ ہے تاہم ٹیم کیسا کھیلے گی اس کا انحصار اس بات پر ہے کہ ٹیم خود کو مختلف صورت حال میں کیسے ایڈجسٹ کرتی ہے۔